Kalibo Aklan——-Gindumdom ni Sangguniang Panlalawigan (SP) Consultant Mr. Odon Bandiola ro mga manami nga hinimuan ag legasiya nga gin-aywan ni dating Aklan Vice Governor Ronquillo “Kel” Tolentino.
Suno kana maabo nga mga estudyante ro nabag-o ro kabuhi bangud sa pagturo ni Atty. Kel.
Naging maestro man sigon nana si Atty. Kel sa journalism ag religion subject sa Aklan Catholic College.
Matapos nga mapierde kay dating Vice Governor ag dating Aklan Congresswoman Gabrielle Calizo-Quimpo, si Atty. Kel hay nagretiro halin sa pulitika ag ginpadayun ro anang pagserbisyo publiko bilang lawyer-journalist.
Si Tolentino nga naging three-termer Sangguniang Panlalawigan Member hay naging Assistant Provincial Secretary, Provincial Manager it Bureau of Employment Services, Ministry of Labor sa Aklan ag dating Kalibo Sangguniang Bayan Member
Imaw hay naging alumnus man it College Editors Guild of the Philippines ag dating secretary-general it National Union of Students of the Philippines for Western Visayas.
Ko 2004, nailihir imaw bilang Vice Governor it Aklan sa idaeum it ruling local coalition Tibyog Akean, apang napas-eawan sa anang uman nga pagpa-ilihir kontra kay Calizo-Quimpo.
Bilang presiding officer it Sangguniang Panlalawigan, naging instrumento si Tolentino agud nga maipasa ro pilang landmark ordinances, eakip ro Economic Enterprise Development Department.
Naging professor it law school ag naging kaparte it socio-civic organizations kapareho it Philippine National Red Cross, Aklan Press Club ag Boy Scouts of the Philippines.
Nakataeanang igahatud sa anang ulihing paeahuwayan si Atty. Kel sa Lunes nga adlaw, Marso 1, 2021 pagkatapos it necrological mass ag memorial services nga maga-umpisa bandang alas-9 it agahon nga pagapangunahan it Provincial Government sa ABL Memorial Sports and Cultural Center.
Madumduman nga namatay ro dating bise gobernador ko Martes it aga-aga, Pebrero 23 bangud sa gina-angkon nga baeatian sa edad nga 78.
