Nanawagan si Senate President Win Gatchalian kay Senator Imee Marcos nga sa baylo nga pumuna, magbulig eon lang ro senadora nga mapadasig ro pagpasa it mga priority bills makaron nga 2nd regular session it 20th Congress.
Raya hay kasunod man it pagbatikos ni Sen. Imee sa kapalpakan it Senado sa nagtaliwan nga 1st regular session bangud sa daywang proposed bill eamang ro andang naipasa.
Ginpamilit ni Gatchalian, magkooperar eon lang ro senadora agud nga indi sanda eumagapak bangud nga kon paga-isipon hay kaibahan man sa Sen. Imee sa andang pag-eagapak.
Paathag it Senate president, ro anuman nga hambaeon nanda nga mga senador hay sanda man ro matamaan bangud nga sangka institusyon eamang sanda.
Makaron nga 2nd regular session hay ginhambae ni Gatchalian nga pagapiliton it mga senador nga matapos ro mga prayoridad nga proposed bill sa idaeum it Legislative-Executive Development Advisory Council (LEDAC).
Sa maabot nga Biyernes hay magapatigayon it pueong ro LEDAC para isapinal ro mga proposisyon nga dapat nga unahon ag ginrekomenda nana nga i-prioritize ro mga economic ag business bills bangud sa mahinay nga ekonomiya.
