KALIBO, Aklan—Gin-umpisahan eon it mga telephone ag cable TV companies nga naga-operate sa banwa it Kalibo ro pag-pull-out sa andang mga spaghetti lines ag poste nga owa eon ginagamit.
Suno kay Vic Basia, head it task force clearing operation it LGU-kalibo nga nauna eon nanda nga gin-abisuhan ro mga natungdan nga kompaniya agud nga maging maligwa sa panan-awan ro mga nagaba-eang-gangat nga wiring.
Bilang preparasyon man sa mga event sa banwa it Kalibo kapareho it nagahilapit nga Kalibo Sto. Niño Ati-atihan Festival hay ginmanduan ro nasambit nga mga kompaniya nga pataasan ro andang mga manaba nga wiring agud nga indi makatuga it disturbo.
Makabig sigon nga mabuhay eon nga problema ag obstruction ro naga-eksister nga spaghetti wires sa mga nagapangunang karsadahon sa Kalibo.
Kinahang-ean sigon nga mag-observe it standards ro mga telcos ag cable companies sa pagkabit it mga cables, utility wires nga kaeabanan nga nakakabit sa poste it Akelco agud nga masiguro ro kaeowasan it publiko.
Kadungan kara, nag-apela si Basia sa mga telephone, cable ag telecommunication companies nga hugut nga magsunod sa naga-eksister nga municipal ordinance sa pagkakas it spaghetti wires.
