KALIBO, Aklan—Naka-lock down eon makaron ro bilog nga nasyon it Spain.
Raya hay kasunod man it nagapadayon nga epekto it 2019 coronavirus disease ukon COVID-19.
Suno kay Bombo International Correspondent Janette Dizon, tubong banwa it Nabas apang presenteng nagatrabaho sa Madrid, Spain, limitado eon sigon ro andang hueag bangud nga sa bilog nga Espanya hay ro Madrid ro may pinakamataas nga kaso it COVID-19.
Hugot nga ginapatuman makaron ro social distancing, pagsuksok it mask ag paggamit it alcohol maskin sa sueod it baeay.
Ro bukas eamang sigon makaron hay ro mga grocery stores ag supermarkets agud nga may mabak-ean sanda it pagkaon engkaso nga maubos ro andang stock.
May mga Pilipino man suno kana nga namatay apang uwa eon raya napabalita pa kaparehas sa pinakaulihing Pinoy nga namatay nga sangka 80-anyos nga eaeaki.
Suno pa kay Dizon, uwa eon it mabakae nga alcohol, hand sanitizers ag face mask sa andang lugar bangud nga mabaskog nga demand.
Ginpahayag dugang nga maskin sigidas ro pag manufacture it face mask ag alcohol hay inde gihapon raya kasapat sa mga nagakinahang-ean sa bilog nga Espanya.
Sa pinakaulihing datos, ro Spain hay nakalista it 102,136 nga kaso it COVID-19.
Sa nasambitang numero, 9,053 ro namatay samtang 22,647 ro nakarecover.
