Kalibo Aklan ——–Sa tunga it Community Quarantine bangud sa COVID-19 pandemic, padayun nga ginapatuman it Social Security System (SSS-Aklan) ro “no contact dropbox system”.
Suno kay Stephanie Joy Espino, tagapaghambae it SSS-Aklan nga tuyo kara nga mapatuman ro social distancing ag malimitahan ro ginaeauman nga pagbuhos it mga kliyente .
Bukas sigon sanda umpisa lunes hasta biyernes, alas-8 hasta alas-5 it hapon.
Apang ro cut-off sa mga nagabayad hay hasta eamang it alas-4 it hapon .
Ro ginabaton pa eamang nanda nga mga kliyente makaron hay ro mga nagabayad nga miyembro.
Mag-eowas sa mga nagabayad nga member, ro ibang mga transaksyon hay pinaagi eon sa andang hotline para sa nagkaeain-eain nga mga claims ag queries .
Hugut gihapon nga ginapatuman ro “no mask and face shield, no entry policy kamana man nga ro mga kliyente hay ginalaygayan nga magdaea it andang kaugalingon nga ballpen .
May available sigon sanda nga drop box sa guwa it andang opisina para sa pagbaton it mga applications para sa benefits ag loans, kun sa siin makataliwan ro 24 oras hay ginabuksan .
Prayoridad sigon it SSS ro ikamayad nga eawas ag kaeowasan it mga miyembro ag pensiyonado kara.
