NEW WASHINGTON, Aklan — Padayon nga gina-imbestigan it New Washington Municipal Police Station ro nagtuhaw nga stabbing incident sa Brgy. Puis.
Suno kay P/Lt. Theresa Grace Reynaldo, deputy chief of police New Washinton MPS, nasayuran gamit ro CCTV footage nga nagtuhaw ro insidente ala 1:05 it aga-aga. Ro biktimang 18-anyos, kaibahan ro anang 3 igkampod hay nagatikang eon kunta pauli apang, nakaengkwentro nanda ro 14 nga mga tinuga, nag-angkon sigon it komosyon kaya nabun’an ro biktima ag nag-angkon it tama sa anang idaeom nga parte it waea nga tiyan. Insigida man rayang gin daea sa ospital para mataw’an it nagakaigo nga pag bueong.
Dugang pa ni P/Lt. Reynaldo nga insigida sandang nag-conduct it hot pursuit, sa bulig it mga Sangguniang Kabataan ag Baranggay Tanod nga nag-responde sa biktima, natumod ro mga persons of interest. Napick-up eon sigon nanda ro 12 sa mga tinuga ag eaban kanda hay mga menor-de-edad.
Samtang ro gina hambae nga sambato pang biktima nga 16-anyos nga nag-angkon it lastro sa idaeom nga parte it anang likod hay mahambae sigon nandang may koneksyon sa insidente bangud naga-guwa nga sambato imaw sa mga persons of interest.
Pahayag dugang ni P/Lt. Reynaldo nga sa makaron hay naga-padayon pa ro imbestigasyon para pasabton ro suspek, ag kun may bastante eon sigon nga ebidensya hay pwede rayang pasakaan it kasong Attempted Homicide.
Padayon man sigon ro andang ginahimo pa pag patrolya sa makaeain-eain nga barangay nga sakop it andang taeatapan.
