Nagapangatubang sa reklamong pag-eabag sa Republic Act 9165 ukon ro “Comprehensive Dangerous Drugs Act of 2002” ro sangka Street Level Individual ukon SLI nga naaresto sa ginkasa nga buy-bust operation it Lezo Municipal Police Station ag Provincial Drug Enforcement Unit ukon PDEU sa diversion road nga sakop it banwa it Lezo bandang alas-8:30 it gabi-i it Miyerkules, Marso 18, 2026.
Nakilaea ro suspek sa alyas nga “Bert”, sangka tricycle driver ag residente it sangka barangay sa nasambit nga banwa.
Suno kay P/Lt. Zoila Hilario, deputy chief of police ag Public Information Officer it Lezo MPS nga mabuhay eon nga tiempo ro surveillance sa suspek ag kabi-i eamang natiempuhan ro anang pagbaligya it illegal nga droga sa andang poseur buyer.
Positibong nagbaligya ro suspek it sangka sachet it ginadudahan nga shabu gamit ro P1,000 nga marked money.
Sa pagka-aresto, nabo-oe halin kana ro daywa pa gid nga dugang nga sachet it suspected shabu.
Ginaboeobanta nga kapin sa sangka gramo ro kabilugan nga timbang it nakumpiskang iligal nga droga nga may Standard Drug Price nga P6,800. Pinaagi kara hay uman nga ginpamatud-an it kapulisan nga indi magapundo ro andang operasyon hasta nga matapna ro kalakalan it iligal nga droga sa lugar.
