KALIBO, Aklan—Gintalakay sa session it Kalibo sangguniang bayan ro angot sa pagstrikto sa implementasyon sa pagsunod ag pagmonitor sa traffic lights regulations.
Suno kay Kalibo sangguniang bayan member Ronald Marte, kinahang-ean ro maid-id nga pagmonitor it mga miyembro it Kalibo Auxillary Police ukon KAP sa mga motorista nga naga-eabag sa batas trapiko.
Ginsuhestyon it konsehal nga kinahang-ean nga kada traffic lights hay may KAP members nga nagabantay agud nga matapna eagi ro mga violators.
Nataeopangdan sa banwa it Kalibo nga maabo gihapon ro mga motorista ag byahero nga uwa nagasunod sa traffic lights regulations nga posibleng tunaan it aksidente.
Bangud kara, magapatawag sigon imaw it committee hearing kaibahan ro Kalibo municipal police station agud nga istoryahan ro nasambit nga isyu.
Ro banwa it Kalibo hay ginakabig nga sambilog sa mga pinakamasako nga banwa sa probinsya it Aklan rason nga kinahang-ean nga madisiplina ro mga byahero ag motorista kamana man ro hugot nga pag-implementar it rules and regulations it mga traffic enforcers.
Mag-eowas kara, kinahang-ean nga visible man ro mga traffic enforcers sa mga lugar nga masaming nakaangkon it traffic.
