KALIBO, Aklan—Haom eon ro mga student athletes it Aklan nga makipagsambuwa kontra sa ibang schools divison sa nagahilapit nga Western Visayas Regional Athletic Association (WVRAA) Meet 2026 nga igapatigayon sa Passi City.
Suno kay Dr. Darren Naelgas, Education Program Supervisor Alternate Division Information Officer it Department of Education ukon DepEd Aklan, kapin sa 983 delegates ro ginpadaea it Aklan sa nasambit nga pahampang.
Sa nasambit nga numero, 641 ro athletes; 91 coaches; 25 assistant coaches; 37 chaperoons ag 47 DepEd trainors.
Mag-eowas kara, may gin-augment man nga non-DepEd staff ro pilang LGU’s agud nga magbulig sa pag-ensayo sa mga atleta samtang temporaryong nagadayon sa Passi City college.
Ginpahayag dugang ni Dr. Naelgas, sa unang kahigayunan hay magapasakop ro DepEd Aklan sa hampang weightlifting nga igarepresentar it secondary boys and girls.
Mag-eowas kara, may atleta man nga makipag-agawan it medalya sa futsal elementary girls ag sa football secondary girls.
Ro WVRAA Meet 2026 hay maga-umpisa ro regular sporting events halin it Marso 18 hasta it 22, 2026.
Kapin sa 6,965 contingents nga maghalin sa waeong schools division nga ginakaeakipan it Aklan, Antique, Capiz, Iloilo Province, Iloilo City, Passi City ag Guimaras ro magapasakop sa nasambit nga sporting events.
Ro tema makaron nga dag-on hay “Stronger Champion, Greater Heights”.
