Pormal eon nga ginsumite sa taeatapan ni House Secretary General Cheloy Garafil ro sueat para sa pagbawi it ikaywang impeachment complaint kontra kay Vice President Sara Duterte.
Ro 17 complainants halin sa nagkaeain-eain nga civil society groups, kaibahan si Tindig Pilipinas co-convenor Kiko Aquino Dee, hay nag-agto sa Kamara kaibahan sanday Mamamayang Liberal party-list Rep. Leila de Lima ag Akbayan party-list Rep. Percival Cendaña agud nga ipasaka ro dokumento.
Sa andang sueat, ginpahayag it grupo nga ginabawi nanda ro ikaywang reklamo ag pagasuportahan eon lang ro ikatlong impeachment complaint nga gindihon it mga pari ag abogado ko Pebrero 9, 2026, nga gin-endorso man ni De Lima.
Ginpamilit man it grupo nga gusto nanda nga malikawan ro anumang kuwestiyon sa petsa it pagdihon it andang reklamo.
Ro ikaywang complaint hay gindihon ko Pebrero 2, 2026, kaparehong petsa it unang set it reklamo, samtang ro unang impeachment complaints hay gin-aksyunan ko Pebrero 5, 2025.
Suno kay dating Congressman Atty. Neri Colmenares, nagtau it daean ro desisyon it Korte Suprema nga nagadeklarang unconstitutional ro unang set it reklamo agud nga makadihon it uman it panibag-ong complaint.
Ginpaathag nana nga base sa SC ruling, dapat napasueod sa order of business ro unang reklamo ko Enero 14, 2025 ag naipasa sa Committee on Justice pag-abot it Enero 21, rason nga pwede kunta nga makapasaka it bag-ong reklamo ko Enero 16 pa eamang.
Sa kabilugan, ap-at nga impeachment complaints ro naka-pending kontra kay Duterte, kaibahan ro mga gindihon it Makabayan Coalition, civil society groups, lawyers ag clergy, ag ni Atty. Nathaniel Cabrera.
Suno kay Committee on Justice chair ag Batangas Rep. Gerville Luistro, paga-umpisahan eon it komite ro pagtalakay sa sufficiency in form and substance it ap-at nga reklamo.
Haeos magkapareho ro mga alegasyon sa ap-at nga complaint, kaibahan ro gina-alegar nga saea nga paggamit it confidential funds ag iba pang pageabag sa 1987 Constitution, apang kaibahan kara tanan ro testimonya ni Ramil Madriaga, dating aide ni Duterte.
Sa anang affidavit, ginhinyu ni Madriaga sa Office of the Ombudsman nga imbestigahan si Duterte angot sa gina-alegar nga pagdaea it mabahoe nga kantidad it kwarta sa nagkaeain-eain nga indibidwal.
Owa pa it pormal nga imbestigasyon ro Ombudsman angot kara.
