KALIBO, Aklan — Nagapati ro Office of the Provincial Agriculture (OPA)-Aklan nga may bastante nga suplay it mga nagapangunang pagkaon sa nasyon makaron nga holiday season.
Suno kay Engr. Alexys Apolonio it OPA-Aklan nga ro anang ginatumod hay ro mga agricultural produce partikular ro mga tinuea ag prutas.
Bastante sigon ro mga tinuea kapareho it pinakbet variety kamana man ro patatas, carrots, kamatis, sibuyas ag iba pa nga kaeabanan hay halin sa probinsiya it Aklan ag Luzon.
Dugang pa ni Engr. Apolonio nga bukon eamang it bastante ro supply kundi nga masarangan man ro presyo sa pihak nga nakaangkon it sangkiri nga pagtaas nga 10% to 20% sa anang presyo kumpara ko nagtaliwan nga daywa hasta tatlong buean.
Samtang, kaabuan sigon sa mga prutas nga ginabaligya makaron hay mga imported nga kaeabanan hay naghalin sa China kapareho it mga mansanas, orange ag ubas.
Ro sibuyas sigon hay medyu na-kontrol eon ro presyo nga naga abot eon lang sa P170 hasta P200 ro kada kilo kumpara ko nagtaliwan nga mga binuean nga P300 hasta P350 per kilo matapos nga magpatuman it nagakaigo nga tikang ro gobyerno.
