KALIBO, Aklan—Nagakaubusan eon it supply it dugo sa probinsya it Aklan. Raya hay bangud sa ginapatuman nga community quarantine sa probinsya tunga it pagpanaeasa it coronavirus disease (COVID-19).
Suno kay Mary Joe Galleon it Philippine Red cross – Aklan Chapter nga sa makarun hay nabawasan it masobra 70 percent ro andang supply it dugo.
Kanselado eun man suno pa kana ro ibang mga blood letting activity kung sa siin raya kungta hay makabulig gid para makatipon it maabong supply.
Kaabuan eamang sigon makarun sa mga nagadonar it andang hamili nga dugo hay ro may mga pasyenteng kinahangean gid matughungan it dugo.Hugot man nandang ginapatuman makarun ro replacement policy.
Sa makarun suno pa kana hay nagabatun sanda it walk in donors sa andang opisina. Kinahangean eamang magpakita it sangka Donor it anang ID ag certification maghalin sa andang Barangay ukon sa RHU.
Bawae man ro mga dating ginakabig nga Person under monitoring (PUM’s) ag Person under investigation (PUI’s) ukon sa makarun hay ginatawag nga suspected sa COVID-19.
Samtang ginpasiguro man kara nga ro tanan nga kliyente nga nagasueod sa adang opisina hay gina-obliga nga maghugas it andang alima ag magdisinfect it ginasuksok nga sapatos ukon tsinelas.
Samtang nag-apela man si Galleon sa tanan nga mga healthy individuals nga magdonar it andang dugo.
Suno kana nga bukon eamang it COVID-19 ro krisis sa makarun kungdi pati man sa supply it dugo.
Ginpahayag dugang nga mas mataas makarun ro demand kumpara sa supply it dugo sa probinsya.
