KALIBO, Aklan — Una eon sa paghinakop it pulisya ro suspek sa pagpamuno nga nag-eontad sa Brgy. Tigayon, Kalibo, aga-aga it Sabado, Mayo 24, 2025.
Boluntaryong nagsurender si Josel Beltran Salonzo, sa legal nga edad ag tubong banwa it Libacao apang presenteng nagaistar sa Brgy. Mangan sa banwa it Banga.
Si Salonzo hay unang nag-surender sa mga awtoridad it Libacao Municipal Police Station bago gindaea sa Kalibo MPS.
Madumduman nga ginbuno it suspek ro anang kainuman sa sangka baraka sa nasambit nga lugar nga nakaangkon it lastro sa kilid ag likod.
Base sa naging imbestigasyon it pulisya, nakaangkon anay it mainit nga diskusyon ro magtimbang nga parte nga nagresulta sa komosyon ag pagkabuno sa biktima.
Sa makaron, si Salonzo hay nakakulong sa detention facility it Kalibo Municipal Police Station para sa nagakaigong disposisyon samtang ro biktimang si alyas Nognog hay padayon nga naka-confine sa intensive care unit it sangka pribadong ospital sa banwa it Kalibo para sa nagakaigong pagbueong.
