NATIONAL News —- Igaduso sa 19th Congress ro suspensiyon it excise tax sa petrolyo sa oras nga sumaka eon sa $80 ro kada bariles it krudo sa tunga it naka-abang eon man nga price increase sa masunod nga domingo.
Suno kay House Ways and Means Committee Chairman Joey Salceda, igaduso nana nga otomatikong boe-on ro excise tax sa oras nga magsobra sa $80 ro kada barrel it Dubai crude.
Sa pihak kara, eampas eon sa $110 ro preso it kada bariles it Dubai crude nga nagapangunang gina-import it Pilipinas.
Ginklaru man ni Salceda nga maskin nga eampas eon sa $100, indi raya dapat nga patungan it excise tax bangud nga raya sigon ro anang nakikitang countervailing ukon countercyclical mechanism agud nga indi magsalig sa DSWD, DBM ag DOF.
Para man kay IBON Foundation Executive Director Sonny Africa, dapat kato pa ginbo-oe ro excise tax sa langis nga nagapa-antus sa transport sector ag middle class.
Ginapanipuslan sigon it gobyerno ro pagkinahangean sa produktong petrolyo agud nga pataason ro kita sa tiempo it kalisod.
Ginpamilit ni Africa nga kun sinsero ro gobyerno nga magbulig hay sobrang mabahoe nga bagay nga makontrol nanda ro presyo it petrolyo.