KALIBO, Aklan — Kipo ro bibig ni Sangguniang Bayan Hilbert Napat it Nabas, Aklan, tag-iya it Dimple Star Company sa pag-kansela it Land Transportation Franchising and Regulatory Board (LTFRB) sa 11 prangkisa ukon katumbas it bilog nga fleet it bus it anang kompaniya matapos nga maeakot sa aksidente ro sangka bus kara ko buean it Marso nga ginkamatay it 19 nga katawo ag ginkanina it 21 iba pa.
Pilang beses nga ginhana it Bombo Kalibo nga boe-an it pahayag si Napat apang uwa raya nagasabat.
Nagpamalibad man nga magkomento ro anang mga empleyado bangud uwa sigon sanda it kasayuran sa kaso.
Nasayuran nga napagdesisyunan it LTFRB ro pagkansela sa prangkisa it kompaniya it bus matapos ro deliberasyon sa ginakaeakutang aksidente matapos nga mahueog sa bangin ro sambilog sa andang bus sa Sablayan, Occidental , Mindoro.
Sa record it LTFRB, halin 2011 hasta it 2018 ro nasambitang bus company hay naeakot eon sa waeong aksidente sa karsadahon, kon siin 25 katawo ro namatay ag 134 ro naninahan.
