Sa arthritis, nagakasamad ro cartilage sa adlaw adlaw nga paggamit.
Suno sa pagtuon, ro free radicals hay posibleng atakihon ro selula, magtaas ro paghaeok ag mapadasig ro proseso it paggueang, kaibahan ro pagkasamad it joints ag cartilage.
Rason nga manami nga idugang sa inyong gina-eaha ro maabung antioxidants nga mabo-oe sa prutas, tinuea ag green tea.
Ro tamang pagkaon sa mga may arthritis hay ro madahong tinuea ag citrus fruits nga bugana sa antioxidant nga nagasukoe sa mga free radicals ag nagabulig para protektahan ro joints.
Ro tawong may arthritis hay kinahangean nga makabo-oe it mas maabu nga antioxidants, eabi eon ro vitamin C ag beta-carotene halin sa pagkaon.
Ro vitamin C sa citrus nga prutas kapareho it dalanghita, suwa, simuyaw, lemon ag orange.
May antioxidant nga makit-an sa madahon nga tinuea nga nagapanaba sa peligro it arthritis.
Samtang, ro pinya hay may bromelain, sangka protein-digesting enzyme ag nagasukoe sa paghaeok.
Suno sa pagtuon, epektibo raya agud nga mabawasan ro pagsakit tuga it osteoarthritis, kapareho man sa pag-inom it bueong sa sakit.
Owa pa it side effect ro pinya.
Ro mga matambok nga isda kapareho it sardinas, mackerel, salmon, tuna ag tamban hay bugana sa omega-3 fatty acids.
Raya hay nagapabaskog it produksiyon sa anti-inflammatory fats nga ginatawag nga resolvins nga nagakontra sa paghaeok.
Ro curry, turmeric, euy-a ag ibang spices hay nagasukoe sa paghaeok sa arthritis.
Ro euy-a, turmeric ag curry hay may sangkap nga curcumin, nga nagapugong sa enzymes ag protina nga nagasueong it paghaeok.
Ro green tea, sibuyas, strawberry, kamatis ag citrus fruits hay naga-angkon it quercetin.
Base sa pagtuon, ro quercetin hay sangka antioxidant ag anti-inflammatory.
