Nagtaas eon man ro presyo it petroleum products ko Martes.
Raya ro ikaywang sunod nga domingo nga nagtaas ro mga kompanya it langis.
Nabalewala ro rollback nga ginpatuman ko nagtaliwan nga mga domingo bangud nga ginkaon man it daywang magkasunod nga oil increase.
Unang apektado kara hay ro mga jeepney driver bangud nga balik eon man sanda sa dating sangkiri nga kita sa bilog nga adlaw nga pagbiyahe.
Maskin nga nadugangan ro minimun nga pamasahe apang insigida man nga ginbawi bangud sa magkasunod nga mabahoe nga fuel increase.
Ag ro masakit, sa masunod nga domingo hay may mabahoe eon man nga oil increase.
Ag ro masubo nga forecast, posibleng maging P100 eon ro kada litro it gasoline antes nga matapos ro 2022.
Ro mabahoe nga dugang sa presyo it petroleum products hay nagatau eon man it pagkabaeaka sa publiko nga posibleng humirit eon man it fare increase ro mga bus ag jeepney drivers.
Engkaso nga raya hay matabu, makaeoeo-oy eon man ro pumueuyu nga pirmeng apektado it pagtaas it presyo it langis.
Posible man nga magtaas ro presyo it mga nagapangunang baeak-eon.
Samtang padayun ro pagtaas it langis, padayun man nga nagabagsak ro balor it piso kontra sa dolyar nga sa makaron hay naga abot eon sa P59 pesos.
May nagahambae nga antes nga matapos ro 2022, magiging P60 pesos eon ro sangka dolyar.
Kon matabu ro nasambit nga bangungot ngara, siin pagapueuton ro mga Pilipino nga sa makaron hay tadtad it utang.
May panibag-ong utang ro Marcos administration rason nga nadugang raya sa mabahoe nga kautangan nga gin obra it dating administrasyon ni President Duterte.
Pwedeng suspendihon anay ro pagpatong it tax ag kon magbalik eon sa normal ro presyo it kada bariles hay dikara magsukot it buwis.
Raya eamang ro sangka pamaagi agud nga mapaugan ro paeas-anon it pumueuyu nga makaron hay nagareklamo it kabudlay sa pagpangabuhi.
Pamatian it gobyerno ro reklamo it kaabuan.
