KALIBO, Aklan–“Almost done” eun ro pag-construct it temporary stalls sa Kalibo Public Market.
Raya hay base sa pahayag ni Market Master Supervisor Abel Policarpio.
Ginapahayag dugang nga sa pihak it ginapangatubang nga pandemya hay padayun ro paghimo it tikang it Local Government Unit (LGU-Kalibo ) para mataw-an it nagakaigo nga pwesto ro mga vendors nga naapektuhan matapos masunog ro nasambitan nga tindahan.
Sa makarun suno pa kana hay kapin sa 22 nga mga stalls eun lang ro kinahangean nga matapos para ma-accommodate ag makabaligya sa sueod it public market ro tanan nga vendors.
Ro mga manugbaligya man sigon ro mismong naghingyo kanda nga indi anay magpwesto sa sueod it public market ag pagahueaton eun lang nga matapos ro construction agud dueongan nga makasaylo sa lugar.
Samtang, ginpahayag man ni Policarpio nga owa nanda ginaduea ro posibilidad nga ma-relocate ro mga vendors sa ibang lugar para sa re-construction.
Apang sa makarun hay gin-estudyuhan pa sigon nanda ro angay ag bagay nga estruktura ag ginapahauman pa ro bugdetary requirements.
Gineaygayan man kara ro mga manugbaligya nga magpasaeamat eun lang maskin sangkiri ro ginakita.
Maswerte man sigon ro mga raya kumpara sa ibang pomoeuyo nga nadu-eaan gid it trabaho bangud sa coronavirus disease ukon covid-19.
