KALIBO, Aklan—Ginmando eon it alkalde it Malay, Aklan ro temporaryong pag-ban sa mga local ag foreign tourist nga makasueod sa banwa ag maging sa isla it Boracay.
Base sa Executive Order No. 04 series of 2020 nga ginpirmahan ni acting Mayor Frolibar Bautista, hugot nga ginabawaean nga makasueod sa nasambitang banwa ag sa isla ro tanan nga may travel history halin sa China, Macau ag Hongkong sa nagtaliwan nga 14 diyas.
Ginpahayag sa Bombo Radyo ni Madel Joy Tayco it Local Government Unit (LGU) Malay nga kaparte raya it andang precautionary measure sa ginabantayang 2019 Novel coronavirus acute respiratory disease.
Kaeakip kara ro mga Filipino ag dumueoong turista nga may planong sa isla iselebrar ro valentine’s day.
Agud eubus nga mabantayan ro mga nagasueod sa sikat nga isla, may gintaeanang border patrol sa tanan nga entry point nga imaw ro magasikyar sa travel history it mga bisita ag bakasyunista.
Ro nasambitang tikang hay kasunod eon man sa rekomendasyon it ginbilog nga Inter-Agency Task Force Against 2019 Novel Coronavirus.
Sa pihak kara, uwa sigon it dapat nga ikabaeaka ro mga residente ag turistang una sa isla bangud uwa pang kumpirmadong kaso it 2019 N-Cov sa isla ag maging sa bilog nga probinsya it Aklan.
