KALIBO, Aklan — Hugut nga nagpaandam ro Technical Education and Skills Development Office (TESDA)-Aklan sa mga nagahandum nga magtrabaho sa isla it Boracay nga indi magsumite it huwad ukon pekeng dokumento sa andang aplikasyon sa mga hotels ag resorts sa isla.
Sa press release nga ginpaguwa, ginpamilit ni TESDA Provincial Director Joel Villagracia ro paandam bangud sa reklamong naka-abot kanda angot sa mga pekeng National Certificates (NCs) nga ginabaligya sigon sa balor nga P2,500 hasta P3,000 sa pilang gustong mag-apply it trabaho eabi eon sa mga massage therapist.
Sa ginhimo nga pag-usisa sa mga dokumento, owa nagakasinanto ro mga code nga nakabutang sa sertipikasyon.
Ginatumod pa it ahensiya ro mga eakot sa pagpeke it mga dokumento agud nga paguwaon nga nagpaidaeum sa kinahangean nga pagsasanay ro sangka aplikante nga requirement it mga employer.
Ginklaru pa ni Villagracia nga owa raya ginabaligya ag ginatau eamang sa mga nakapasa sa Competency Assessment and Certification.
Suhestiyon it TESDA sa mga employer sa Boracay nga usisaon it mayad ro mga dokumentong ginapasa kanda.
