KALIBO, Aklan–Ginkumpirma it pamunuan it Civil Aviation Authority of the Philippines (CAAP)-Aklan nga sa Disyembre 29 hay maga-umpisa eon ro operasyon it Tiger Air halin Taipei, Taiwan paadto it Kalibo International Airport.
Ginpahayag ni Engr. John William Fuerte, Manager it CAAP-Aklan nga raya hay may tatlong beses nga biyahe sa sueod it sang dominggo partikular kada Martes, Huwebes ag Sabado it alas-10:00 it gabi-i.
Naga-average sigon raya it 140 hasta 180 ka mga pasahero.
Angot kara, malipayon man nga ginbalita ni Engr. Fuerte nga nagahueat eon lang sanda it approval it Philippine Airlines para sa slotting it pagbalik it andang daily operation halin Incheon, South Korea umpisa Enero 2023.
Ro KIA hay naga-average it 130 nga International arrival kada adlaw samtang ro domestic hay naga-abot sa 130 hasta 160.
Ginaeauman nga mas pang magabuhos ro numero it mga pasahero sa mga masunod nga dominggo kadungan it pagbukas it mga international ag direct flight.
Sa makaron hay nagapadayun ro direct flight adlaw-adlaw it T-way ag Air Seoul.
Ginpasiguro man kara nga nagapatuman sanda it hugut nga seguridad sa paeuparan kamana man nga may ginplastar sanda nga Malasakit Help Desk para magsabat sa kinahang-eanon ag concern it parehong local ag foreign traveler.
