KALIBO, Aklan — Ginaplanuhan eon makaron it Municipal Engineering Office it lokal nga gobyerno it Kalibo kon anu nga re-construction ro pagahimuon sa nasunog nga tindahan.
Suno kay Municipal Economic Enterprise Development Office (MEEDO) head Engr. Jessie Figarido, ginkasugtanan it majority nga total rehabilitation ro kinahang-ean it pampublikong merkado agud nga masiguro ro kaeowasan it mga nagapanindahan.
Apang, kueang sigon ro ginpromisang P20 milyon ni Senator Bong Go para maabot ro suhestyon it kaeabanan.
Sa makaron suno kana hay ginatinguhaan it mga opisyales it banwa nga makatipon it pondo para maipatindog it uman ro public market bangud nga sambilog raya sa source of income it banwa.
Ginpahayag dugang ni Figarido nga kinahang-ean sigon nga siguraduhon ro istraktura nga uwa eon it mahueog nga mga debris bangud nga ginpasugtan it probinsya nga gamiton temporaryo ro Toting Reyes St. agud nga may mapwestuhan ro mga negosyante ag vendors sa andang mga baligya.
Suno pa kay Figarido, makaron nga adlaw hay magapatigayon sanda it clearing operation partikular sa ikaywang panaeagan it edipisyo agud nga masigurong uwa it maaksidente.
