Kalibo Aklan ——Gin-insister ni Malay Mayor Frolibar Bautista nga paga-estudyuhan nanda ro posibilidad sa uman nga pagbukas it tourism industry sa Isla it Boracay.
Suno sa Alkalde nga gustuhon man nanda nga uman nga buksan ro Isla sa mga turista, kinahangean pa nanda nga hueaton ro “ go signal “ it Inter-Agency Task Force (IATF) National.
Mag-eowas kara, kinahangean pa sigon nanda raya nga istoryahan ni Governor Florencio Miraflores ag iba pang miyembro it Provincial IATF .
Dapat suno kana nga maging madahan eabi pa ag naging instrikto ro andang pagtinguha agud nga indi madugangan ro COVID-19 patient sa nasambit nga banwa nga sangka medical frontliner sa Isla.
Nauna eon nga ginpahayag ni Governor Miraflores nga ginakonsidera nanda sa uman nga pagbukas it turismo sa Isla hay ro kapasidad sa testing ag healthcare.
Gindugang pa ni Mayor Bautista nga nagakabaeaka sigon sanda nga ro insigidang pagbukas it Aklan maskin sa mga kaiping nga probinsiya sa Western Visayas hay magaresulta sa pag-angkon it local transmission.
Sa makaron ro ginapasugtan eamang nga makasueod sa Isla hay ro mga residente ag mga negosyante ag trabahador nga ginpasugtan nga nagbukas it operasyon sa idaeum it General Community Quarantine.
May posibilidad man sigon nga magdugop ro mga Aklanon ag indi masunod ro social distancing engkaso nga pasugtan ro pagpaligos sa baybayon it Boracay sa mga local tourist.
Ko Mayo 15, nagbakae ro Provincial Government it Reverse Transcription-Polymerase Chain Reaction (RT-PCR) machine nga igabutang sa ginatapos eon nga laboratory kaibahan ro iba pang testing equipment.
Ginapadasig eon man it Provincial Government ro pagproseso it accreditation it Provincial Hospital bilang testing laboratory.
Engkaso suno kay Governor Miraflores nga makaangkon it kaugalingon nga testing laboratory, ro pag-detect it virus hay mapadasig sa sueod eamang it 24 hasta 48 oras .
