KALIBO, Aklan—Nagnaba it kapin sa 61% ro tourist arrivals sa Isla it Boracay ko buean it Setyembre.
Suno kay Felix Delos Santos, Chief Tourism Operations Officer it Malay Tourism Office nga halin sa masobra sa 157,000 nga nailistang turista ko buean it Agosto hay nag-abot eon lang raya sa 122,373 na tourist arrivals ko Setyembre kun sa siin ro domestic visitors hay umabot sa 106,776 samtang ro mga foreigners hay nakarehistro it 12,513 arrivals ag 3,084 ro OFWs/OFs.
Ginpaathag nga kaeabanan nga nagadagsa sa isla sa makarondaya nga buean hay mga Asian tourists, apang makaron hay South Korea pa eamang ro may direct flight sa Kalibo International Airport.
Ginaeauman nga sa ikatlong domingo it Oktubre hay uman nga magasaka ro tourist arrivals bangud sa pagbalik it mga face to face nga events partikular ro sikat nga October fest.
Nagadere-deretso eon sigon raya hasta it Disyembre kun sa siin mag-eowas sa domestic tourists hay ginaeauman nga magabuhos ro maabu nga mga turista halin sa Europe ag US nga nagabakasyon agud nga makalikaw sa andang maeamig nga klima.
Sa pihak nga parte, kasado eon man suno kana ro andang recovery and resiliency plan, security and peace and order plan ag sistema sa sea and aqua sports nga ginpahaum para sa mga domestic and international tourists.
Panawagan kara nga respetuhon ro mga ginapatuman nga ordinansa it banwa.
