KALIBO, Aklan—Nagapabilin nga mataas ro tourist arrival sa isla it Boracay sa pihak nga natapos eon ro week long celebration it Love Boracay kon sa siin naghakot raya it libo-libong mga turista halin ko Abril 25 hasta it Mayo 1, 2025.
Suno kay Kathrine Licerio, tagapaghambae it Malay Tourism Office nga uwa naganaba sa average nga 6,500 tourist ro nagasueod sa Boracay kada adlaw sa pagsueod it buean it Mayo.
Sa kamatuoran suno kana, nakalista ro andang taeatapan it kabilugang 98,749 nga tourist arrival halin ko Mayo 1 hasta it Mayo 15, 2025.
Sa nasambit nga numero, 85,565 kara ro domestic tourist; 763 ro mga overseas Filipino’s ag 12,421 mat-a ro mga foreign tourist.
Ginpahayag dugang ni Licerio nga base sa andang datos, nagapabilin pa sa peak season rason nga libo-libo pa ro naga-aeabutan nga mga turista sa isla.
Ginaeauman nga magapadayon pa ro mataas nga tourist arrival bago ro pagbukas it klase sa nagkaeain-eain nga parte it nasyon.
Sa makaron suno kana hay nagapanguna gihapon ro Boracay sa mga nagapangunang destinasyon it mga lokal nga turista nga eubus nga nakabulig sa sektor it turismo sa Boracay.
