KALIBO, Aklan — Haeos 17 porsyento ro ginsaka it tourist arrival sa Isla it Boracay ko buean it Marso it makaron nga dag-on kon igakumpara sa parehong period it nagtaliwan nga dag-on .
Suno kay Kathrine Licerio, tagapaghambae it Boracay-Malay Tourism Office, naglista ro andang taeatapan it kabilugan nga 200,165 nga tourist arrival ko buean it Marso kumpara sa nairecord nga 171,305 ko 2025.
Sa nasambit nga numero, 164,922 kara ro domestic tourist; 2,318 ro overseas Filipinos ag 32,925 man ro foreign tourist.
Suno pa kay Licerio, ro datos hay sa pihak it naeksperyensiyahan nga tensyon sa Middle East nga nagresulta sa pagmahae it presyo it mga produktong petrolyo.
Nagaeaum sigon sanda nga sa masunod nga mga binuean hay mas pa nga magataas ro tourist arrival eabi pa ag nagsueod eon ro summer vacation .
