KALIBO, Aklan— Ginpaboran ni Vice President Leni Robredo ro isyung nakabulig ro Tax Reform for Acceleration and Inclusion (TRAIN) Law sa ibang sector it sosyodad apang bukon it sa mga kubos nga eubusang natamaan it epekto kara.
Sa sangka interview kay Robredo matapos ro anang diskurso sa tunga it mga pamatan-ong nagtipon para sa “Ugyon Pamatan-on” Leadership Summit sa Barangay Caticlan, Malay, Aklan, ginpahayag kara nga hasta sa makaron hay uwa gihapon it immediate nga bulig nga ginata-o ro gobyerno para mabawasan ro epekto it padayon nga pagtaas it mga baeak-eon partikular eon ro nagapangunang kinahang-eanon it mga pumueoyo.
Sa pihak nga parte, ginbulgar it bise presidente nga uwa ginpasudla ro andang team sa isla it Boracay mga tatlong buean eon ro nakataliwan agud nga magta-o kunta it bulig sa mga residenteng naapektuhan it six (6) months closure nga ginmando mismo ni Pangueong Rodrigo Duterte bangud sa mga environmental issues sa nasambitang isla.
May kaangtanan kara, ginpasiguro ni Robredo nga bukas sigon imaw sa posibilidad nga magpadaea it uman it team sa Boracay para ipadayon ro naunsyami kara nga pagbulig sa mga residenteng nawad-an it pangabuhian sa temporaryong pagpasarado it Boracay ko Abril 26 nga kon sa siin ginbuksan eon raya it uman sa publiko ko Oktubre 26, 2018.
