KALIBO, Aklan — Matapos nga maduea-an it preno, tumagilid ro sangka trak ag nahueog sa kanae sa national highway nga sakop it Brgy. Libertad, Nabas, Domingo it agahon.
Suno kay Police Corporal Andrew Andrade it Nabas Police Station, ro nasambit nga behikulo hay ginamaneho ni Orlando Foja, 48, residente it Brgy. MV Hechanova, Iloilo City sakay ro tatlong ka mga pahinante nga ginkilaea kanday Eric Degala it Iloilo City; Edil Caangay it Mindanao; ag Clark Manolong it Cabancalan, Negros Occidental.
Ginpahayag dugang ni P/Corporal Andrade nga base sa andang imbestigasyon, may karga nga construction materials ro trak nga ginakaeakipan it tiles, plywood, wirings, PVC ag electrical wiring halin sa syudad it Iloilo nga iga-deliver kunta sa isla it Boracay.
Apang, pag-abot sa nasambit lugar hay nawad-an it preno ro saeakyan rason nga uwa eon nakontrol it driver ro manibela nga naging rason it andang pagtakilid ag nahueog ro tanan nga kariton sa tu-o nga porsyon it truck sa kanae sa kilid it karsada.
Una sa outer lane ro truck rason nga owa raya nagtuga it mabug-at nga daeagan it trapiko.
Owa man it napabalita nga naninahan sa insidente.
