KALIBO, Aklan—Mag-eowas sa sentro it selebrasyon sa Manila, ginaeauman nga magadagsa man ro mga deboto sa nagkaeain-eain nga banwa sa probinsiya it Aklan agud nga magbuylog sa Traslacion it Itom nga Nazareno.
Suno kay Truly Flaviano Jr., deboto it Black Nazarene nga uman sanda nga magabalik sa Aklan makaron nga adlaw it Biyernes matapos nga magbuylog sa libu-libong mga deboto sa Traslacion sa Manila.
Ro pinaka-highlight suno kana it andang localized Translacion sa Aklan hay sa maabot nga Enero 18 sa banwa it Malinao .
Raya hay paga-umpisahan it sagrado nga misa sa St. Joseph The Worker Parish Church ag pagasundan it foot procession ukon pasanan sa Translacion .
Sa Enero 19 hay pagadaehon ro imahe it Itom nga Nazareno sa Tambuan Malinao ag makaangkon man it misa ag prusisyon.
Magaderetso sanda sa Enero 21 sa Rosario Malinao para sa kaparehong aktibidad.
Pagkatapos kara hay makaangkon it motorcade it imahe paagto sa Poeo-poeo Jugas New Washington kun sa siin makaangkon it bisperas prusisyon nga magalibot sa bilog nga Brgy Jugas ag Candelaria sa nasambit nga banwa .
Sa Enero 28 pagadaehon ro imahe it black Nazarene sa Cauyan, New Washington .
Sa pihak nga parte, ginpahayag pa ni Flaviano nga makaangkon it kahigayunan ro mga deboto it Nazareno sa Isla it Boracay nga makapasakop sa Traslacion nga maga-umpisa it alas 8 it agahon hasta alas 5 it hapon nga magalibot sa bilog nga isla.
Raya hay pagasundan it “misa mayor” sa Our Lady of the Most Holy Rosary sa Brgy. Balabag .
