KALIBO,Aklan — Kasado eon ro igapatigayon nga transport strike nga pagapasakupan it public utility vehicles maghalin sa nagkaeain-eain nga transport group nationwide sa maabot nga adlaw it Lunes, Hulyo 24 kadungan sa ikaywang State of the Nation Address ni Pangueong Ferdinand Marcos Jr.
Apang, ginklaro ni Manibela chairman Mar Valbuena nga natyempo eamang sa SONA it presidente ro andang ginplano nga transport strike nga may katuyuan nga ipaabot sa gobyerno ro andang hinaing angot sa scheme, guidelines ag requirements it Department of Transportation ukon DOtr ag Land Transportation and Franchising Board ukon LTFRB sa implementasyon it PUV modernization.
Bukon it ro modernization program it gobyerno ro andang ginapaninggitan kundi ro sistema sa pagpatuman kara partikular ro masyadong mahae nga modernong jeepney ag ro mga kooperatiba nga andang ginapasakupan nga sa sueod it sang dag-on hay uwa haeos sanda nakabaton it dibidendo.
Ginpahayag nga inde magnaba sa 200,000 public utility vehicles ro makipagbahin sa untat-byahe sa 9 nga rehiyon sa bilg nga nasyon kaibahan eon sa Metro Manila.
