USA – Nakahaom eun ro kampo nanday US Vice President Kamala Harris ag dating US President Donald Trump para sa andang unang debate.
Hiwaton raya it alas-9 it agahon sa Miyerkules oras sa Pilipinas sa National Constitution Center it Philadelphia.
Sa ginahimo nga pagpahaom ni Harris hay gin-istorya nana sanday US President Joe Biden ag dating US First Lady Hillary Clinton nga haatubang eun si Trump sa mga debate.
Nagapahaom man si Harris sa anuman nga insult nga mahimo iaeapog kana ni Trump.
Nagapati man ro kampo ni Harris nga sa nasambitan nga debate hay maga-angkon eun it desisyon ro mga ginakabig nga undecided voters.
Sa bahin mat-a ni Trump ginpahayag kara nga bukon nana it kinahangean ro anumang pormal nga pagpahaom bangud nag-angkon eun raya it pueong sa senior advisers, policy experts ag mga kaalyado.
Ginpakigbahin man it campaign spokesperson ni Trump nga si Jason Miller ro pilang mga topiko nga ieapog nanda kay Harris.
Ginakaibahanan raya it saea nga pagbuyot nana sa US-Mexico border, Illegal Immigration, pagbawi sa mga sundalo it US nga nakataeana sa Afghanistan ag ro paghina it ekonomiya.
