Nagpaandam si U.S. President Donald Trump nga posibleng makaangkon it mas grabeng giyera sa Middle East engkaso nga mapas-eawan ro peace process sa Iran, kadungan it pagtaas it presyo it langis ag padayun nga tensyon sa Strait of Hormuz.
Sa anang pahayag, ginpabutyag ni Trump nga magapabilin ro mga puwersang militar it Amerika sa rehiyon hasta nga maangkon ro kasugtanan sa kalinong, ag engkaso nga indi raya magamadinaeag-on hay magapangatubang ro Iran sa mas maeapad ag mas mabagsik nga opensiba.
Ginmitlang pa nana nga haum ro U.S. ships, aircraft, ag personnel nga may dugang nga armas agud nga samaron ro andang “substantially degraded enemy” kun kinahangeanon.
Kadungan kara, gin-report nga nagtaas ro presyo it langis sa pangkalibutanon nga merkado, mas mataas kumpara sa presyo antes nga nag-umpisa ro joint U.S.-Israel operations.
Hasta sa makaron hay bukon pa it klaru ro saklaw it ceasefire, eabi eon pagkatapos it maeapnagon nga airstrikes it Israel sa Lebanon nga pumatay it masobra sa 250 katawo, butang nga gintawag it Iran ro mga negosasyon nga “unreasonable.”
Sa pahayag man it White House spokesperson nga si Karoline Leavitt, ginpaabot nana nga indi magpadaea-daea ro media ag publiko sa mga naratibo it Iran, bangud nga iba man ro ginahambae kara sa parte it America.
