KALIBO, Aklan — Ginatantyang malugi it $538 milyon ukon katumbas it masobra sa P26 bilyon ro industriya it turismo sa isla it Boracay ag bilog nga probinsya it Aklan makaron nga unang quarter it presenteng dag-on matapos nga magpatuman ro gobyerno it travel ban pasueod ag paguwa it China bangud sa outbreak it 2019 Novel Coronavirus Acute Respiratory Disease (2019-nCoV ARD).
Suno kay 2nd District Congressman Teodorico Haresco Jr., engkasong magbuhay pa ro travel ban sa China nga pangaywang pinakamabahoe nga tourism market sa isla hay kapin pang maapektuhan ro pag-negosyo ag tourist spending sa lugar.
Ko nagtaliwan nga dag-on, nakalista it 434,175 nga Chinese tourists ukon haeos 50% it andang 865,419 nga foreign visitors nga bumuhos sa isla halin Enero hasta it Mayo nga ginakabig nga peak season.
Kaangot kara, nag-apela man si Congressman Haresco nga likawan ro pagpakalhit it fake news kaangot sa nCoV bangud kapin eamang raya nga makaapekto sa sektor it turismo.
Haeos 60% it island hopping ag iba pang water sports activities, kamana man kaeabanan sa mga vendors, tricycle drivers, tattoo artists, ag masahista ro apektado makaron it travel ban.
Pilang Chinese restaurants man ro nagsarado samtang kaeabanan sa mga reserbasyon sa mga hotels hay ginkansela.
