KALIBO, AKLAN — Insigida nga naaresto ro sangka manakaw nga nagbueo it maeahaeong cellphone it sangka turistang Chinese nga nakapila sa Caticlan jetty port nga patabok eon kunta sa isla it Boracay.
Ginkilaea ro turistang si Jiacan Xu, 22, taga-China ag bakasyunista sa Boracay.
Base sa report, nakapila sigon ro biktima sa nasambitang pantalan kat madukutan it suspek nga ginkilaeang si Richard Rivera, 37, taga-Iloilo ag temporaryong naga-istar sa Cavite.
Natumod eon ro identity it suspek kat i-review ro CCTV sa nasambitang lugar.
Sa sueod eon it barko ro suspek kat maaresto it mga kapulisan, apang uwa eon narekober kana ro cellphone it turista bangud naipasa eon sigon raya sa anang kaibahan nga madasig man nga nakapanago.
Nagapadayon ro imbestigasyon it Malay Police station sa nasambitang insidente.
