NEW WASHINGTON, Aklan — Plano it provincial government nga uman nga buksan ro operasyon it Roll-on/Roll-off ukon RoRo vessels sa Dumaguit Port sa banwa it New Washington sa maabot nga buean it Mayo sakto sa pag-abo it summer season.
Raya ro ginkumpirma ni Nieven Maquirang, Executive Assistant V to the Office of the Provincial Governor.
Sa makaron hay padayun ro andang negosasyon sa mga shipping company agud nga matumod ro schedule, ruta ag barko nga magabiyahe.
Ro operasyon it pantalan hay pagadumaeahan it Terminal Supervisor nga si Gerry.
Dugang pa ni Maquirang nga tuyo it nasambit nga proyekto nga i–decongest ro Caticlan port, kun sa siin, isaylo ro ibang biyahe halin sa Batangas paagto sa Dumaguit agud mapabaskog ro ekonomiya sa eastern side it Aklan, partikular eon sa Kalibo ag New Washington nga medyo mahina makaron pag-abot sa turismo.
Ginatun-an man nanda nga i-link ro ibang probinsiya kapareho it Roxas City Capiz, Romblon ag Cebu.
Kaibahan sa plano ro pagsaylo it mga igabiyahe nga livestock bangud nga ro Caticlan jetty port hay gateway paagto sa Isla it Boracay nga sangka tourist zone.
Nasayuran nga ro nasambit nga tikang hay kaparte it plano ni Governor Joen Miraflores kabulig ro Philippine Ports Authority nga makabuoe it dugang nga income-generating projects ag pangabuhian para sa mga pumueuyu sa nasambit nga lugar.
Gindugang pa it opisyal nga mandato it PPA nga magbulig sa mga pantalan agud makatao it maayos nga pagbiyahe ag mapadasig ro koneksyon sa nagkaeain-eain nga destinasyon nga mabahoe nga bulig sa negosyo ag transportasyon it mga tawo.
Madumduman nga ko dekada 90, kilaea ro New Washington bilang nagapangunang pantalan sa probinsiya, apang amat-amat nga naduea sa indi nana masayuran nga rason sa pagtaliwan it mga dinag-on.
