KALIBO, Aklan — Nakadepende sa nagapungko nga presidente it sangka nasyon ro pagdesisyon kon magahalin ag magabalik it uman bilang miyembro it International Criminal Court (ICC) .
Raya ro ginpahayag ni Atty. Janmar Barrios it Barrios Law Firm angot sa ginasueong it pilang mamalidha nga magbalik it uman ro Pilipinas bilang miyembro it ICC.
Raya hay kasunod sa pag-aresto ag pagdaea sa The Hague, Netherlands kay dating Pangueong Rodrigo Duterte.
Suno kana nga sambilog sa mga benepisyo engkaso nga magbalik ro nasyon sa ICC hay makaangkon it tagapagbantay kontra sa mga kaeainan ukon pagpang-abuso nga ginahimo it mga nagapungko nga opisyal.
Makaangkon sigon it proteksyon ro mga Pilipino kun mauman ro mga pagpang-abuso kapareho sa gina-akusar kay Duterte angot sa maeapnagon nga patayan sa ginlunsar nga war on drugs.
Samtang, ginpaathag ni Atty. Barrios nga maskin nga masobra sa 30,000 ro gina alegar nga numero it mga ginpatay sa war on drugs, apang 43 eamang ro ginpili it ICC ukon representative sample nga ginatawag nga nakitaan it mga mabaskog nga ebidensiya sa natabu nga extra judicial killing ukon pagpatay nga owa it due process.
Ginpahayag nga magabuhay ro trial kon paga tigsambilugon ro gina alegar nga numero it mga ginpamatay .
Madumduman nga ko 2019 hay pormal nga naghalin sa Rome Statute ro Pilipinas sa mandu ni dating Pangueong Duterte bangud sa rason nga may kaugalingon nga nagagana nga justice system ro nasyon.
