KALIBO, Aklan–Sa pihak nga medyu nakabawi eon ro balor it piso kontra dolyar ko nagtaliwan nga mga inadlaw, apang ginakabaeak-an nga uman raya nga magasadsad sa masunod nga domingo.
Base sa datos, nadugangan it sangkiri it kapin sa 43 sentimos ro haega it piso matapos nga magsarado raya sa 58.55 pesos halin sa dating masobra sa 59 pesos ko nagtaliwan nga buean.
Apang ginpahayag ni Bombo International Correspondent Greg Aguilar it California USA ag sangka negosyante man nga posibleng uman nga makaexperiensiya it pagnaba it balor it piso sa masunod nga domingo matapos nga uman nga ginpataasan it US federal reserve ro andang short term interest rates it dugang nga 75 basis points.
Posibleng masundan pa sigon raya sa buean it disyembre it kapareho man nga kantidad.
Bangud kara, ginaeauman nga uman nga magabaskog ro dolyar kontra sa iba pang mga kwarta ukon currencies.
Sa makaron hay padayun suno kana ro pagbaskog it ekonomiya it amerika ag pamatuod kara ro paghimo it 261,000 nga mga bag-ong trabaho.
Ro US inflation rate year over year hasta ko setyembre hay naga abot sa 8.2% ag ginaduso nga mapanaba sa 3%.
Sa pihak kara, ginapanan-aw ni aguilar nga indi pa eubusan nga makabawi ro piso hasta sa katapusan it makaron nga dag-on nga posibleng bumagsak pa sa 60 pesos ro pagbaeayluhan kontra sa sang dolyar ag magapadayun hasta nga indi makontrol ro US inflation.
Pila sa mga rason it world inflation suno kana hay ro padayun nga pag instrikto it china kontra covid 19; Ukraine-Russia war nga naging rason it pagtaas it presyo it produktong petrolyo ag iba pa.
Laygay nana nga samtang bukon pa it establi ro sitwasyon, panabaan anay ro demand sa imported goods sa baylo suportahan ro local industries.
