Ginpaabot ni US President Donald Trump nga posibleng tapuson eon it Estados Unidos ro mga operasyong militar kontra sa Iran sa sueod it daywa hasta tatlong domingo, maskin nga owa it nakasugtanan nga diplomatiko, sa tunga it pagsueod it ikalimang domingo it giyera.
Suno sa White House, magatau it pahayag si Trump agud nga i-update ro publiko sa giyera nga ginkamatay it libu-libo eon nga katawo, naka-apekto sa suplay it enerhiya, ag nagtuga it pagkabaeaka sa pangkalibutanon nga ekonomiya.
Ginpahayag man ni US Defense Secretary Pete Hegseth nga nagapadayun ro pag-istorya sa Iran apang haum ro Washington nga padayunon ro operasyon kun indi magsunod ro Tehran sa mga ginapangayo it US, kaibahan ro pagpapundo sa uranium enrichment ag uman nga pagbukas it Strait of Hormuz.
Samtang, ginpahayag man ni Iranian Foreign Minister Abbas Araqchi, may nabaton sanda nga mensahe halin sa US envoy apang indi pa raya makabig nga pormal nga negosasyon.
Kadungan kara, nagpaandam ro Iran’s Revolutionary Guards kontra sa mga kumpanyang may kaangtanan sa US sa rehiyon, kaibahan ro Microsoft, Google, Apple, Intel, IBM, Tesla, ag Boeing.
Sa makaron hay mas pa nga nag-eapad ro bakbakan sa rehiyon, kaibahan ro panibag-ong kinagamo sa Lebanon kun sa siin pitong katawo ro namatay ag 24 nga iba pa ro naninahan sa mga airstrike sa Beirut.
Nagpanawagan ro China ag Pakistan it insigidang ceasefire, samtang nagtuhaw man ro magka-ibang opinyon it pilang kaalyado it US, eabi eon sa Europa, angot sa operasyon militar.
Nag-umpisa eon man nga mabatyagan ro epekto it giyera sa pangkalibutanon nga enerhiya, matapos mag-eampas sa $4 kada galon ro presyo it gasolina sa US, pinakamataas sa masobra sa tatlong dag-on.
Nagguwa man sa survey it Reuters/Ipsos nga 2/3 it mga Amerikano ro gusto eon nga wakasan ro pakikisawsaw it US sa giyera sa mas madali nga tiempo.
