Nakatutuk makaron ro bilog nga kalibutan sa unang presidential debate para sa United States 2024 presidential elections.
Raya hay sa tunga it daywang nagsirbi ag presenteng nagaserbing pangueo it ginakabig pinakamanggaranon nga nasyon sa bilog nga kalibutan.
Apang bukon it kapareho ko unang pag-atubang nanday dating President Donald Trump ag President Joe Biden para sa 2020 presidential elections, may pilang mga pagbag-o sa pagahiwaton nga debate makaron ag raya hay ginaeakipan it mga masunod:
1. Owa it magiging studio audience. Buot hambaeon nga owa it magapakita it suporta sa sueod it studio, owa it maga-cheer ukon magakontra sa mga kandidato, anuman ro magiging daeagan it andang debate.
2. Otomatikong pagapatyon ro mic it kandidato nga magasobra sa gintau kana nga speaking time. Owa man it pirmeng interruption bangud nga pagapatyon ro mic it kandidato kon bukon pa nana it oras nga maghambae.
3. Gintaeana ro debate sa sueod it 90 minutes.
Samtang, nauna eon nga nagpasugot ro daywang kandidato nga magasunod sanda sa mga sueundanan nga pagagamiton para sa nasambit nga debate.
Pila kara hay ro mga masunod:
1. Pagataw-an eamang it sangka ballpen, papel, ag bottled water ro kada kandidato sa pagsueod sa forum.
2. Indi dapat nga magdaea ukon maggamit it props ukon notes ro mga raya.
3. Bangud nga televised debate, si Biden hay magatindog sa right side it mga tumaean-aw samtang si Trump hay sa left side.
4. Makaangkon it coin toss agud nga matumod kun sin-o ro ulihing magahambae ag raya hay naagto kay Trump. Buot hambaeon, si Trump ro magatau it last word.
5. Indi pwedeng mag-interrupt ro mga campaign staff sa daywang kandidato sa sueod it daywang break nga ginkasugtanan.
Sa makaron, si Biden hay 81 anyos samtang si Trump hay 78 anyos. Ro daywa hay ro pinakamagueang nga kandidato sa pagkapangueo sa kasaysayan it US.
Pila sa mga nakataeana nanda nga pagatalakayon hay ro mga importanteng isyu sa US, kapareho it mataas nga presyo it mga baeak-eon, mga migrants sa US-Mexico border, ag ro nagapadayun nga Israel-Gaza ag Russia-Ukraine war.
