KALIBO, Aklan — Nagdihon it reklamo sa Malay Police Station ro sangka negosyanteng Singaporean/Chinese national kontra kay Department of Environment and Natural Resources (DENR) Undersecretary Benny Antiporda.
Ro reklamo hay ginakaeakipan it physical assault, public humiliation ag threat.
May nagpatunga sigon nga uwa pagkailintindihan sa tunga nanda it opisyal sa ginpatigayong pueong sa sangka hotel sa isla.
Base sa reklamo ni Peter Tay, general manager it sangka travel and tours sa isla nga nakaangkon sanda it diskusyon ni Usec. Antiporda matapos nga ipaabot kara sa Department of Tourism (DoT) ro concern it Boracay Tour Operators.
Dismayado sigon imaw sa pagpati nga uwa nakonsulta ro DOT sa isyu antes naghimo it kaugalingong regulasyon ag patakaran ro DENR.
Ginapasugtan eamang makaron it DENR ro pagpatigayon it mga water sports activities sa Boracay kon raya hay ginpa-book pamaagi it mga hotels ag resorts, kon siin katuyuan kara nga malikawan ro pag-abo it mga illegal tour coordinators sa isla nga nagapangulit sa mga turista sa beachfront.
Gusto pa it ahensiya nga makaangkon it seperadong pick-up points sa Station 1 ag 3 para sa nagkaeain-eain nga water activities.
Si Tay hay Board of Director man it Boracay Foundation Incorporated (BFI), Board of Director it Tourism Congress Philippines ag Liason Officer for Consul Assist nga gin-ilihir it China Embassy Manila.
