KALIBO, Aklan—Ginpahayag ni Civil Aviation Authority of the Philippines ukon CAAP-Aklan manager Engr. Eusebio Monserate Jr. nga uwa pa it byahe ro eroplano halin Mayo 16 hasta it 31 it presenteng dag-on.
Raya hay maskin nga gin down grade pa sa modified general community quarantine ro bilog nga probinsya it Aklan.
Mag-eowas kara, uwa pa man suno kana it airline companies nga nag-apply it flight bangud maskin sanda hay kinahang-ean nga mag-adjust sa passenger capacity it eroplano tuga it ginapatuman nga social distancing.
Eauman suno kay Monserate nga maabong proseso ro pagaagyan it mga byahero antes nga makabyahe.
Engkaso gidman sigon nga magbalik ro operasyon sa Kalibo International Airport hay haom eon sanda nga mag-cater it mga pasahero ag ginaeauman eon ro pila ka mga pagbag-o sa new normal matapos ro pandemya.
Haom eon sigon ro implementing bodies it paeoparan kon sa siin nakapatigayon eon sanda it simulation exercises sa mga ginaantisipar nga matabo sa new normal nga panyempo.
