KALIBO, Aklan—Nagapati si sangguniang panlalawigan member Atty. Harry Sucgang nga indi basta-basta nga mabasura ni Pangueong Rodrigo Duterte ro Visiting Forces Agreement ukon VFA.
Raya suno kana hay nakabaehag sa konstitusyon.
Dapat sigon nga mag-agi sa concurrence it senado ro pag-atras it nasyon sa sangka tratado kapareho it VFA.
Madumduman nga nagdihon ro Senado it petisyon sa Korte Suprema angot sa pag terminate it gobyerno sa VFA.
Suno kay Atty. Sucgang nga tuyo kara nga matumod ro matuod nga obligasyon it Senado sa naging desisyon it pangueo nga magguwa eon ro Pilipinas sa kasugtanan kara sa Estados Unidos.
Ro VFA suno kana hay kaparte it mutual defense treaty nga engkaso nga giyerahon ro nasyon hay magabulig ro Amerika ag magabulig man ro nasyon kon magakinahangean it bulig ro US.
Mabahoe sigon ro bulig kara sa mga soldado it nasyon pinaagi sa andang ginatau nga training partikular sa surveillance ag intelligence gathering.
Nagabulig man sigon ro mga raya sa tiempo it kalamidad.
Gindugang pa kara nga kon gusto gid man ni Duterte nga i-terminate ro VFA hay dapat nga unahon anay kara ro mutual defense treaty.
