KALIBO, Aklan— Naeksperyensyahan it Visayas delegation partikular it Aklan Athlete para sa Batang Pinoy National Finals sa Baguio City ro pagpanaeasa it nagtaliwang Typhoon Ompong sa Northern Luzon.
Sa interview it Bombo Radyo Kalibo kay Coach Jovie Ote it Aklan, kanya-kanyang diskarte ro mga delegado it Visayas region agud maeowas ro andang mga kaugalingon matapos nga masamad ro sambilog sa mga kwarto it Baguio Central School kon siin sanda nagpabilin matapos nga ginhuyop it mabaskog nga hangin ag ginsundan pa it mabaskog nga buhos it uean.
Dugang pa kara nga nag-black-out sa bilog nga probinsya rason nga gin-abisuhan gilayon kara ro mga ginikanan it atleta ag anang ginpasiguro ro kaeowasan it mga estudyante.
Samtang, nagta-o sigon it food assistance si Baguio City Mayor Mauricio Domogan sa tanan nga mga delegado.
Nasayuran nga ginkansela it Philippine Sports Commission (PSC) ag Baguio City Government ro opening ceremony it 2018 Batang Pinoy National Championships agud masiguro ro kaeowasan it tanan nga mga delegasyon kasunod it pagpanaeasa it bagyong Ompong.
Samtang, ko Setyembre 17, gin-umpisahan ro kompetisyon ag sa Setyembre 22 igapatigayon ro grand closing ceremonies.
