KALIBO, Aklan—Ginpangunahan ni Vice President Leni Robredo ro paglunsar it Ahon Laylayan Koalisyon sa probinsya it Aklan nga gin-atendiran it kapin sa 2,000 ka mga leaders maghalin sa sector it women urban poor, fisher folk, transport, senior citizens, youth, faith-based organizations ag mga mangunguma nga ginpatigayon sa NVC Gymnasium sa banwa it Kalibo.
Sa media briefing, ginpahayag ni Robredo nga ro katuyuan kara hay agud nga mataw-an it kahigayunan ag boses ro mga nagkaeain-eain nga sektor sa sosyudad nga mapaabot ro andang concern sa gobyerno agud nga mausuyan it solusyan.
Samtang, ginaeauman eon suno kana ro pagnaba it poverty incidence sa nasyon bangud nga nakaplastar eon ro institutional reforms nga naga-adress sa kapobrehan kaparehas it pantawid pamilya program ag mga programa para sa mga mangingisda ag mangunguma nga nag-umpisa sa administrasyon ni dating Presidente ag makaron hay House Speaker Representative Gloria Macapagal-Arroyo hasta sa presenteng administrasyon ni Presidente Rodrigo Duterte.
Sa pihak nga parte suno kay Robredo, bukon pa it klaro sa makaron kon anu ro naging basehan it Philippine Statistic Authority ukon PSA sa andang kalkulasyon kaangot sa poverty threshold nga ro sangka pamilyang may limang miyembro hay kinahang-ean nga may 10,481 pesos para mapun-an ro andang basic food ag non-food needs sa sueod it sang buean.
Suno kana, kueang sigon raya para mahambae nga makakaon it tatlong beses sa sang adlaw ag mata-o ro iba pang kinahang-eanon it sangka pamilya.
Apang, mas makapamayad nga hueaton eon lang ro magiging paathag it PSA sa andang mga ginpaguwang datos.
