Presenteng ginapahauman nanday Vice President Sara Duterte ag dating Pangueong Rodrigo Duterte ro pag-atubang sa imbestigasyon it International Criminal Court (ICC) angot sa madugong war on drugs it Duterte administration.
Raya ro ginpahayag ni VP Sara maskin nga bukon pa imaw it kaibahan sa complaint ukon imbestigasyon it permanent international tribunal.
Apang, gin-ako it Bise Presidente nga dapat eon pahauman it mayad it anang ama nga si dating Pangueong Duterte ro imbestigasyon it International Criminal Court bangud sa imaw ro ginaimbestigahan.
Madumduman nga nauna eon nga ginpahayag it dating Presidente sa ika-11 pagpamati it House Quad Committee ko Miyerkules nga haom imaw nga makipagbuligan sa imbestigasyon it ICC ag ginhangkat nga paspasan ro pag-imbestiga.
