KALIBO, Aklan—Umabot sa 215 ro kabilugan it numero it mga bumotong kongresista para sa impeachment ni Vice President Sara Duterte.
Halin raya sa numero it mga mamalidha nga 318.
Sa nasambit nga numero hay 255 ro mga mamalidha nga halin sa mga distrito ag 63 nga mamalidha ro halin sa mga partylist.
Nagakahueogan raya nga naeampasan it Kamara ro target nandang numero nga 102 eamang.
Bangud kara, ginpahayag ni Atty. Harry Sucgang, sangka political analyst sa probinsya it Aklan nga nagakadapat eon man gid ro makaraya nga tikang agud nga maobligahan ro trabaho bilang elected official nga ginsaligan it pumueoyo para magpangibabaw ro laye sa eksakto nga pamaagi.
Nahimo man sigon raya kay Renato Corona, ro ika-23rd chief justice it Supreme Court of the Philippines nga na-impeached ko December 12, 2011.
Samtang sa pihak nga parte, ginkumpirma ni Senate President Francis “Chiz” Escudero nga indi magpatigayon it impeachment trial kay Vice President Sara Duterte samtang naka-break ro andang sesyon.
Ginpahayag ni Escudero nga pagakinahang-eanon ro plenaryo it Senado para maumpisahan ro impeachment court.
Kahapon hay nag-adjourn eon ro session it Senado agud taw-an it daean ro nagahilapit nga campaign period para sa 2025 national and local elections.
Magabalik ro andang sesyon sa Hunyo 2.
