Ginpamalibaran ni Vice President Sara Duterte nga kilaea nana si dismissed policeman ag dating security officer ni former Speaker Lord Allan Velasco nga si Rodulfo Gracioso Jr. ag hugut man nga ginpahayag nga owa imaw it nabaton nga anumang kwarta halin kana.
Sa ginpaguwa nga pahayag, adlaw it Sabado, Setyembre 26, ginpahayag it bise presidente nga ginahueat it anang mga abogado ro opisyal nga kopya it sinumpaang panaysayon ni Gracioso halin sa National Bureau of Investigation (NBI) antes nanda nga umpisahan ro mga kasong gusto nanda nga ipasaka kontra kana.
“Once we are done dismantling the lies contained in his testimony, it will end up in the trash bin—just like the one from Ramil Madriaga,” pahayag ni Duterte.
Nauna eon nga nagguwa si Gracioso, nga nagpakilaeang dating head of security ni dating House Speaker Lord Allan Velasco, ag ginhambae nga naghatid sigon imaw it mga maletang may sueod nga kwarta kay Duterte, dating Pangueong Rodrigo Duterte, ag Davao City First District Representative Paolo Duterte
Suno pa kay Gracioso, masobra sa P2 bilyon sigon ro anang ginhatud kay Vice President Duterte sa masobra sa 20 nga kahigayunan.
Sa anang pahayag, gintawag ni Duterte nga sangka “media stunt” ro mga alegasyon ag gin-insister nga kaparte raya it paghana nga buhi-on ro impeachment case kontra kana.
Ginpahayag dugang it Vice President nga ro anang kampo hay magapahaum it mga kaso kontra kay Gracioso matapos mabo-oe ro opisyal nga kopya it anang affidavit halin sa NBI.
