KALIBO, Aklan — Patay eon kat maka-abot sa Aklan Provincial Hospital ro sangka welder matapos nga makuryente sa Brgy. Tabayon, Banga, Martes it hapon.
Ginkilaea ni Police Staff Sargent Randy De Pablo it Banga Police Station ro biktima nga si Waren Pareñas, sa legal nga edad ag residente it Brgy. Sta. Teresa, Tapaz, Capiz.
Base sa andang inisyal nga imbestigasyon, nagreport sa andang taeatapan si Lucio Prias, tag-iya it gina-construct nga gasolinahan sa nasambit nga lugar nga suno kana, samtang nagatakod it steel trash si Pareñas gamit ro welding hay gulpi eamang raya nga nakuryente, nakabuhi ag nahueog sa eogta nga kapin sa ap-at ag tunga sa metro ro kaatason halin sa ibabaw.
Ginpahayag dugang nga ueo ro unang tumugpa rason nga nalipong gid ro biktima.
May kaangtanan kara, insigida sigon nanda nga gindaea sa nasambit nga hospital si Pareñas apang gindeklarang patay it nagtatap nga doktor.
