Posibleng sa Indonesia pa gihapon ro manghod ni dating Bamban Mayor Alice Guo nga si Wesley Guo suno sa Bureau of Immigration.
Ginhambae ni BI spokesperson Dana Sandoval nga uwa pa sanda it nababaton nga kumpirmasyon halin sa Indonesian authorities kung nakahalin eon it andang nasyon si Wesley apang nagapati sanda nga una pa raya sa Indonesia.
Gingsugid it BI nga may nabaton nga impormasyon ro bureau nga naghalin it Indonesia si Wesley paadto it Hong Kong apang uwa man sigon it kumpirmasyon ro Hong kong authorities angot kara.
Si Wesley Guo hay ginbutang sa Immigration Lookout Bulletin Order (ILBO) bangod sa sambilog raya sa persons of interest nga may kaangtanan sa ginsaeakay nga POGO hub nga involved sa mga ilegal nga aktibidad.
Samtang, presente eon sigon nakikipag-angot ro BI sa Indonesian authorities para sa pagbalik ni Alice Guo o Guo Hua Ping sa Pilipinas matapos rayang maaresto.
Base sa mga balita halin sa Indonesian government, ginhambae ni Sandoval nga si Alice Guo eamang isaea sa anang ginarentahang unit kat madakop raya it local authorities bilang illegal alien sa Tangerang city sa Banten, Indonesia.
Una eon man nga ginpahayag it Presidential Anti-Organized Crime Commission (PAOCC) ko Agosto nga naghiwalay ro magmanghod nga sanday Alice ag Wesley sa indonesia matapos nga striktuhan pa it mga awtoridad ro pag usoy kanda.
