KALIBO, Aklan — Nagapati si Atty. Axel Gonzales, sangka kilaeang abogado sa Aklan nga sambilog sa mga pagatalakayon sa ikatlong State of the Nation Address (SONA) ni Pangueong Ferdinand “Bongbong” Marcos Jr. sa Hulyo 22 hay ro angot sa isyu it West Philippine Sea.
Suno kana nga gina-agawan ro nasambit nga teritoryo it maabung nasyon nga napalibot kara eakip ro Pilipinas bangud nga bugana raya sa natural resources.
Mag-eowas sa mga mabahoe nga isda nga nagatau it maayos nga pangabuhian sa mga mangigisda hay ginapatihan nga bugana man raya it mga deposito it langis ag gas.
Sambilog man sigon raya nga major trade route ukon aeagyan it mga barko halin sa nagkaeain-eain nga mga nasyon.
Bangud kara, maabu nga mga kaalyadong nasyon ro nagapasakop sa mga balikatan exercises eakip ro India.
Ro continental shelf sigon it WPS hay makit-an sa Isla it Panay ag posibleng raya hay naghalin pa sa Aklan.
Sakop suno kana it isyu sa West Philippine Sea, ro national securtity, food security ag economic security.
Sa pihak nga parte, ginsuhestiyon ni Atty. Gonzales nga pamatian man ro mga isyu it mga makawaeang grupo bangud nga kaeabanan sa mga raya hay may punto kapareho it pagresolba sa panawagan para sa dugang nga sweldo, disenteng trabaho ag bastanteng social services.
Kamana man ro presyo sa pagkaon ag iba pang nagapangunang baeak-eon, pageabag sa human rights ag war crimes sa anti-insurgency ag anti-crime operations.
Bangud nga agricultural country ro nasyon, kinahangean man suno kana nga alagaan ro mga farmers.
Mabahoe man suno kana ro posibilidad nga matalakay ro angot sa POGO hub nga para anang opinion , indi dapat i-abolish bangud nga mabahoe raya nga bulig sa ekonomiya it Pilipinas.
Sa pihak nga parte, owa pa it pinal nga desisyon si Atty. Gonzales kon uman nga magapailihir sa maabot nga midterm election sa 2025.
May mga tawo nga nagapangasawa sigon kana agud nga makaibahan imaw sa andang official line-up sa maabot nga eleksyon, apang owa imaw it pinal desisyon.//
